#Kannur Crime #Chain Snatching #Mattannur Police #Arrest
കണ്ണൂർ:(www.panoornews.in) സ്കൂട്ടറിലെത്തി യുവതിയുടെ കഴുത്തിലെ സ്വർണമാല പൊട്ടിക്കാൻ ശ്രമിച്ച കേസിൽ രണ്ട് യുവാക്കൾ ജയിലിലായി.
കോഴിക്കോട് പുതുപ്പള്ളി സ്വദേശി പി.വി. അനസ് (29), കൊയിലാണ്ടി സ്വദേശി എ.എസ്. സൂര്യൻ (26) എന്നിവരെയാണ് മട്ടന്നൂർ പോലീസ് അറസ്റ്റ് ചെയ്തത്. ഇരുവരെയും അവരുടെ വീടുകളിൽ നിന്നാണ് പിടികൂടിയത്.
ജൂൺ 30-ന് പഴശ്ശി ഏലക്കുഴി ഭാഗത്ത് വച്ചാണ് സംഭവം. സ്കൂട്ടറിലെത്തിയ പ്രതികൾ യുവതിയുടെ കഴുത്തിൽ നിന്ന് സ്വർണമാല പൊട്ടിച്ചെടുക്കാൻ ശ്രമിക്കുകയായിരുന്നു. യുവതി ബഹളം വച്ചതോടെ പ്രതികൾ രക്ഷപ്പെട്ടു.
അന്വേഷണത്തിൽ പ്രതികൾക്ക് നിരവധി ക്രിമിനൽ കേസുകൾ നിലവിലുണ്ടെന്ന് പോലീസ് പറഞ്ഞു. ഒന്നാം പ്രതി അനസിനെതിരെ മണ്ടൻചേരി, നെയ്യാറ്റിൻകര, നറുവമോട്, കായംകുളം, കൊടുങ്ങല്ലൂർ, മണ്ണാഞ്ചേരി തുടങ്ങിയ സ്റ്റേഷനുകളിലായി ഒന്നിലധികം കേസുകൾ രജിസ്റ്റർ ചെയ്തിട്ടുണ്ട്.രണ്ടാം പ്രതി സൂര്യനെതിരെയും ചൊമ്പാല, വെള്ളയിൽ, ചങ്ങരംകുളം സ്റ്റേഷനുകളിലായി മൂന്ന് കേസുകൾ ഉണ്ട്.
എസ്.ഐ കെ.പി. മുഹമ്മദ് ഫൈറൂസിന്റെ നേതൃത്വത്തിലുള്ള സംഘമാണ് പ്രതികളെ പിടികൂടിയത്. വി.കെ. പ്രകാശൻ, വിനീഷ് കുമാർ, സുനിൽകുമാർ, സീനിയർ സിവിൽ ഓഫീസർമാരായ ദീപേഷ്, സുധീഷ്, വിജേഷ്, പ്രജീഷ്, ജോഷിത്ത്, സിവിൽ ഓഫീസർമാരായ രതീഷ്, റജീൽ, വിജിൽ മോൻ, അനീസ്, ഷമീർ, സരിത്ത് എന്നിവരും അന്വേഷണ സംഘത്തിലുണ്ടായിരുന്നു.കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.
Content Highlight: Two Arrested in Kannur for Chain Snatching Attempt; Accused Have Multiple Cases
#Kannur Crime #Chain Snatching #Mattannur Police #Arrest
