പാനൂരിന്റെ പ്രതിഷേധം ഫലം കണ്ടു: കുറ്റ്യാടി-മട്ടന്നൂർ നാലുവരി എയർപോർട്ട് റോഡ് പദ്ധതി ഉപേക്ഷിക്കാൻ സർക്കാർ

#Kuttiady Mattannur Airport Road #Project #Panoor #Protest

പാനൂർ:(www.panoornews.in) മലബാറിന്റെ ഗതാഗത-വ്യവസായ രംഗത്ത് നാഴികക്കല്ലാകുമെന്ന് പ്രതീക്ഷിക്കപ്പെട്ട കുറ്റ്യാടി-മട്ടന്നൂർ നാലുവരി എയർപോർട്ട് റോഡ് പദ്ധതി അവസാനിപ്പിക്കാൻ സംസ്ഥാന സർക്കാർ ഒരുങ്ങുന്നു. പാനൂർ ഉൾപ്പെടെയുള്ള മേഖലകളിൽ നിന്ന് ഉയർന്ന ശക്തമായ ജനകീയ പ്രതിഷേധമാണ് പദ്ധതിക്ക് തിരശ്ശീല വീഴാൻ പ്രധാന കാരണം.

കണ്ണൂർ അന്താരാഷ്ട്ര വിമാനത്താവളത്തിലേക്കുള്ള പ്രധാന കണക്റ്റിവിറ്റി ലിങ്ക് കൂടിയായ ഈ 57.20 കിലോമീറ്റർ നാലുവരി പാത ഉമ്മൻചാണ്ടി സർക്കാരിന്റെ കാലത്താണ് പ്രഖ്യാപിച്ചത്. 1165 കോടി രൂപ ചെലവ് പ്രതീക്ഷിച്ച പദ്ധതിക്കായി 38 ഏക്കർ ഭൂമി ഏറ്റെടുക്കേണ്ടതുണ്ടായിരുന്നു. കുറ്റ്യാടി മുതൽ മട്ടന്നൂർ വരെ 24 മീറ്റർ വീതിയിൽ രണ്ട് വലിയ പാലങ്ങൾ, 10 ചെറിയ പാലങ്ങൾ, 35 കൾവർട്ടുകൾ എന്നിവയാണ് നിർദ്ദേശത്തിലുണ്ടായിരുന്നത്.

എന്നാൽ പദ്ധതി യാഥാർത്ഥ്യമായാൽ കുറ്റ്യാടി, കക്കട്ട്, മൊകേരി, പാനൂർ, തൂണേരി, ഇരിങ്ങണ്ണൂർ തുടങ്ങിയ ടൗണുകളിലെ ആയിരത്തോളം വീടുകൾ, വ്യാപാരസ്ഥാപനങ്ങൾ, ആരാധനാലയങ്ങൾ എന്നിവ പൊളിച്ചുനീക്കേണ്ടി വരുമായിരുന്നു. ഇതോടെ ജീവനോപാധി നഷ്ടപ്പെടുമെന്ന ആശങ്കയിൽ വ്യാപാരികളും താമസക്കാരും ശക്തമായ സമരത്തിലേക്ക് ഇറങ്ങി.

മേക്കുന്ന്, പാനൂർ മേഖലകളിൽ സ്ഥലം അളന്ന് കല്ലിടുകയും ഉടമകളുടെ പേരിൽ ഗസറ്റ് വിജ്ഞാപനം ഇറക്കുകയും ചെയ്തതോടെയാണ് പ്രതിഷേധം രൂക്ഷമായത്. ഇതിനെ തുടർന്ന് ചില ജനപ്രതിനിധികൾ പുതിയ പൊതുമരാമത്ത് മന്ത്രിയെ നേരിൽ കണ്ട് ആശങ്കകൾ അറിയിച്ചു. ഇതിന്റെ ഫലമായി മുൻ സർക്കാർ പുറത്തിറക്കിയ ഗസറ്റ് വിജ്ഞാപനം പുതിയ യുഡിഎഫ് സർക്കാർ തൽക്കാലം മരവിപ്പിച്ചു.

Also read: സുരേഷിന് ചമ്പാടിന്റെ കണ്ണീർ പ്രണാമം ; അന്തിമോപചാരമർപ്പിക്കാൻ നിരവധിയാളുകൾ

നിലവിൽ പദ്ധതിയുടെ പേരും അലൈൻമെന്റും മാറ്റി, നാലുവരി എന്ന ആശയം തന്നെ ഉപേക്ഷിച്ച് താൽക്കാലികമായി നിലവിലുള്ള റോഡ് വീതി കൂട്ടുക എന്നതാണ് സർക്കാർ ആലോചിക്കുന്നത്. ഭൂമി ഏറ്റെടുക്കുന്നതിന് കിഫ്ബി വഴി 600 കോടി രൂപ കണ്ടെത്തുമെന്നായിരുന്നു പ്രഖ്യാപനം. എന്നാൽ കിഫ്ബിയുടെ സാമ്പത്തിക പ്രതിസന്ധിയും ഫണ്ട് കാലതാമസവും ഈ നീക്കത്തിന് തടസ്സമായി.

2013-ലെ ലാൻഡ് അക്വിസിഷൻ നിയമപ്രകാരം വിപണി വിലയുടെ നാലിരട്ടി നഷ്ടപരിഹാരവും പുനരധിവാസ പാക്കേജും നൽകണമെന്നത് സർക്കാരിന് വലിയ വെല്ലുവിളിയായി. കൂടാതെ സാമൂഹിക ആഘാത പഠന റിപ്പോർട്ടും പരിസ്ഥിതി അനുമതിയും ഇനിയും പൂർത്തിയാക്കാനുണ്ട്.

Content Highlight: Kuttiady Mattannur Airport Road Project Shelved After Panoor Protest

#Kuttiady Mattannur Airport Road #Project #Panoor #Protest